بغيت نخدم راه بّا ضحى بالدم


بغيت نخدم راه بّا ضحى بالدم

ولد الشهيد بقى بلا خدمة
بنت الشهيد بقات بلا ردمة
احنا اولاد الشهيد أشبعتوا فيما نقمة
ما عرفنا كيف درتوا لهاذ القسمة
كليتوا اللحم ، نهشتوا لعظم ما خليتوا حتى الشحمة
ما فيكوم أُمَا غادي تكون فيكم حشمة
الشهيد ضحى بروحو باش تعيش نتا فالنعمة
وولادو مْشومْيينْ هازهوم الما
درتوا حقوقنا ففامكوم فلقمة
وحنا خلليتوا عقولنا طايرة فالسما
وفين نسبة مكفول الامة ؟!!
ولا هاذي غير كلمة
درتوها فالأوراق كيف البصمة
واحسبتونا قطيع كيف البكمة

حقي فالخدمة حق مشروع
ما مات با خاين ما مات مخلوع
ضحى على بلادى راسو مرفوع
ما مشري بفلوس ما مبيوع
كان فحياتو على حبابو مقطوع
إشوفهوم فالعام شهر تحسبوا أسبوع
واش هو من الحديد مصنوع
والراحة منها ممنوع

الأرملة دارت اللي عليها
الله يشفيها ويرضي عليها
قرّات ، ربَّات هاذا ما عليها
وگلاس الدراري والبنات بلا خدمة عمى عينيها
هاذاك عندو دكتوراة أو اللي يوازيها
وكاين اللي عندو شواهد عليا غير طاويها
دوّزْ شلا مبارايات كانوا معروفين ماليها
اللي بغى شي بلاصة بفلوسو يشريها
إيوا قرّي انت وقرّيها

المؤسسة فينك فهاذ الهم
الشهيد راه ضحى من أجل بلادو بالدم
مرتو من قلة خدمة الولاد رشّاها المرض والهم
فينك يا مؤسسة فينك من هاذ الظلم
اللي عطيتوه منصبنا طرطق فينا عينيه ما بغى يحشم
واش فراسك بللي ولد الشهيد باغي يخدم
فين نسبة 25 فالمية حد ما عليها اعلم
رفعتوا علينا شحال هاذي لقلم
حتى واحد فينا من إهمالكم  ما اسلم

ايوا ديروا وحدة فبالكوم راحنا جايين بالعزم و الإرادة
مَرتْ الشهيد ما تكون غير ولّادة
لسبوعا ولفوا القيادة
ولا يموتوا شجعان سابقين الشهادة
هاذا شرف حذاوه من الآباء ولا عادة
ولا تشريف ولا عبادة
بغيت حقي بغيت نخدم بلادي يا سادة

رشيد العيرج                                                               

Publier un commentaire

0 Commentaires