غوات الشهيد سمعناه من بعيد/قصيدة زجلية يرفض من خلالها الشهيد أن يسمع عن عائلته بأنها تعيش المحن



قصيدة زجلية يرفض من خلالها الشهيد أن يسمع عن عائلته بأنها تعيش المحن

غوات الشهيد سمعناه من بعيد 


أنا صوت الشهيد 
جيتكوم من بعيد 
من صحرا دوَّزتْ فيها حََرْ أُبَرد أُعيدْ 
إييه العيد الكبير والصغير ، كل عيد 
وانت يا مسؤول ديما مبرع مع ولادك سعيد 
أنا كنضرب العدس مخلط بالرمل وانت تضرب الدجاج بالتْريد 
أنا نْباتْ عساسْ فالليالي وحيد 
سلاحي الشمع والوقيد 
وانت بإشارة منك إيجيك ما تريد 




هذا صوتي من تحت قبري فالصحرا
جرحي قديم ما بغى يبرا 
واسمع يا مسؤول نعيدليك أش سرا 
أنا ما كاتدير سياسة ما كانزوق هدرا 
أنا صوت الشهداء اللي ما ارتاحوا رشات عظامهوم القهرة 
قهرة اولادهوم وغصة المرا 
 تكرفصوتوا  على عيالاتنا باقيين فالكرا 
ما ارتاحنا فقبورنا من هاذ الجمرة 
مكفول الأمة ، أودّي يا مكفول الامة كولوا ذيك الهدرة 
كليتوا التفاحة ورميتوا لولادنا غير القشرة 
طحنتوهم بصفر لعشرة 
أنا كنت عارف راكم عديان اكثر من العديان ما معاكم عشرة 
ضحينا خلينا الولاد والأحباب خوينا الدشرة 
باش انت يا مسؤول تفهم أتقرا 
قيمة من استشهد فسبيل الصحرا 

لكن ظني خاب مللي شافت عيني عذاب 
عذاب الميمة والزوجة والأولاد شعرهوم شابْ
لا خدمة لا ردمة عياووا من التقلاب 
رديتوهم ورانا عايشين عيشة الكلاب 
عطيتوهوم بالظهر واخذلتونا يا تريكة الذياب 
نكرتوا تضحيتنا وأسرنا غرزتوا فيها النياب 
فقرتوهم ، واهملتوهوم وانتوما عمّرتوا الجياب
واش نسيتوا لاخرة أوما يتسناكوم من عقاب 
ولا صافي الشهيد حرر البلاد أو سديتوا ذاك الباب
هاذاك غير رقم تحرق حيدناه من الحساب 
وبقيتوا فنهاب نهاب نهاب ما كاين غير نهاب 
أوقلتوا هاذاك راه قام بواجبو ، مات أهذا مكتاب
والله كون ما حنا الى دخلوا عليك بيزات فدارك ويحللوا عليك الباب 



أنا ما ناعس يا مسؤول 
قصار الزمن أو إطول 
مايبقى حقي وحق ولادي مجهول 
اسمع لي مزيان ، اسمع للكلام المعقول 
صراخي وغواتي من هنا لأولادي منقول 
دموعي دموع حارقة  ما تعمرها سطول 
صراخي يبلغ أولادي صافي مرسول 
زيدوا فكفاحكوم رضايا ليكوم مشمول 
تهزموا كل طاغي خروف يحسب راسو غول 
قريب النصر ونقرعوا معاهم الطبول 
طبول النصر والانصاف وإيزول الهول 

وْكان أولدي حنا  فبلاد الحق والكرامة 
ما يلعبوا بحقي وحقك دامة
أعطينا ارواحنا للوطن بكل اعتزاز وشهامة
ولكن خرجوا شمايت خرجوا ظلّامة 
رماونا فقبور منسية لا إشارة لا علامة 
ومع حقوقكم يا ولدي داروا سياسة النعامة
داروا فيكم ماداروا فالريوس الحجامة 
ولدي حقك مشروع اجمع مع خوتك اللامة
ارفع راسك راك ولد الشهيد ارفع الهامة 
ارفع صوت الحق بيه ديما انطق ، أ بالسلامة يا ولدي بالسلامة .  
   
  رشيد العيرج  

Publier un commentaire

0 Commentaires